Na súa primeira intervención, José Fernando Silveira Martín agradeceu a confianza dos socios da Agef e o traballo realizado polos seus predecesores no cargo. A máis, comprometeuse a “seguir loitando para mellorar as condicións das empresas familiares galegas, para que sigamos prosperando e contribuíndo ao desenvolvemento económico e social de Galicia”.

A Agef está constituída polas 60 principais compañías de propiedade familiar de Galicia e na asamblea celebrada hoxe fíxose balance das actividades do último ano e definíronse os obxectivos para esta nova etapa que comeza. O presidente electo da Agef constatou o crecemento da xeración de emprego nas empresas familiares galegas, con 447.000 traballadores no último exercicio de 2022. Galicia é a terceira autonomía con maior peso das firmas familiares, que suman 80.000 empresas e representan o 86% de todo o emprego privado de Galicia.

O vicepresidente primeiro da Xunta, Francisco Conde, felicitou ao novo presidente e salientou que a Xunta “ten como prioridade a industria, e ser facilitadora de medidas para favorecer a competitividade das nosas empresas e apoialas nos retos actuais, o enerxético e a dixitalización”.

Perfil de Silveira

Silveira, enxeñeiro industrial de formación, pertence á segunda xeración dunha familia empresaria con intereses no sector naval. É o director xeral do grupo Nosa terra 21 e conselleiro e secretario do seu consello de administración e durante case 25 anos foi responsable do maior hospital privado de España, Povisa.

A xornada contou tamén coa presenza do conselleiro de Facenda, Miguel Corgos López-Prado; a conselleira de Promoción do Emprego e Igualdade, María Jesús Lorenzana; o presidente da Confederación de Empresarios de Galicia, Juan Manuel Vieites; e o presidente de Abanca, Juan Carlos Escotet.