Imprimir

Traballos sobre espazos protexidos, enerxía eólica, sector lácteo e xestión do risco en Galicia gañan os premios do Idega

Redacción Economía en Galicia | 06 de febrero de 2017

Gañadores dos premios Idega, entregados este luns na Universidade de Santiago.
Gañadores dos premios Idega, entregados este luns na Universidade de Santiago.

O Instituto de Estudos e Desenvolvemento de Galicia da USC (Idega) vén de entregar os premios Valentín Paz Andrade e Jesús García Calvo que convoca en colaboración co Consello Económico e Social de Galicia (CES-Galicia) e con Feiraco, respectivamente.

O acto estivo presidido polo reitor Juan Viaño e contou coa participación do presidente da Fundación Feiraco, José Montes Pérez, e a presidenta do CES-Galicia, Corina Porro Martínez.

Juan Manuel Trillo Santamaría e Valerià Paül Carril foron os primeiros en recoller o premio Jesus García Calvo en investigación en desenvolvemento rural e cooperación polo seu traballo ‘Transboundary protected areas as ideal tools? Analyzing the Gerês‐Xurés transboundary biosphere reserve’, no que investigan a Reserva da Biosfera Gerês-Xurés no marco do modelo definido globalmente para a ordenación e xestión dos espazos naturais protexidos transfronteirizos (ENPF).

O investigador do grupo de Economía Ecolóxica e Agroecoloxía da Universidade de Vigo Damián Copena Rodríguez levouse o García Calvo pola súa tese de doutoramento ‘Enerxía eólica e medio rural: unha análise aplicada dos impactos socioeconómicos dos parques eólicos no mundo rural galego’, que lle dirixiu Xavier Simón Fernández. Nela analiza como foi o proceso de implantación e cales foron as consecuencias socioeconómicas da posta en marcha dos parques eólicos no mundo rural galego no período 1995-2014. O traballo achega nova información sobre os procesos de implantación eólica, a análise dos mecanismos de acceso aos terreos eólicos e os resultados económicos obtidos polos propietarios dos terreos rurais onde se instalaron as centrais eólicas.

Na categoría de traballo académico de grao ou mestrado recolleu o galardón Diego Gómez Méndez polo estudo ‘O sector lácteo en Galicia: dinámica recente e perspectivas nun mercado liberalizado’, tendo en conta o novo contexto que se abriu desde o 1 de abril de 2015 co fin das cotas lácteas na Unión Europea. Da súa detallada investigación conclúe, en contraste coa fortaleza do sector produtor, a “debilidade” da industria transformadora e como isto “limita o potencial do complexo lácteo na nosa comunidade”.

A cerimonia de entrega rematou co premio Valentín Paz Andrade, que recaeu no traballo ‘La gestión del riesgo y el seguro en la empresa gallega’, do que é director Luis A. Otero González e son autores Pablo Durán Santomil, Rubén Lado Sestayo, Milagros Vivel Búa e Luis Ignacio Rodríguez Gil, e que foi publicado pola editorial Fundación Inade en 2015. Este traballo explica o nivel de implantación de políticas de xestión do risco, as técnicas aplicadas e a importancia do seguro como ferramenta de transferencia do risco. O estudo profunda ademais nos efectos que ten sobre a empresa, en particular o risco global que asume e a creación de valor.

Puede ver este artículo en la siguitente dirección /articulo/eventos/traballos-espazos-protexidos-enerxia-eolica-sector-lacteo-xestion-do-risco-galicia-ganan-premios-do-idega/20170206182848002696.html


© 2020 Economía en Galicia

Contacto: [email protected] - [email protected]  

Aviso legal