A charla, que impartirá en streaming o vindeiro 21 de abril a consultora e directora de proxectos de creación da Fundación Incyde, Maribel Pérez, afondará nos cambios producidos nos ámbitos social e económico e o seu posible aproveitamento para poñer en marcha iniciativas empresariais nun ámbito rural que está a tomar pulo. O webinario está dirixida tanto a viveiristas, empresas, profesionais, persoas emprendedoras e público interesado.

O punto de partida desta acción formativa está no pulo que está a tomar nos últimos tempos o rural como nicho de negocio e, neste senso, a charla afondará nos cambios producidos nos hábitos de consumo e nos ámbitos social e económico e en coñecer como poden aproveitarse para poñer en marcha novas iniciativas empresariais.

Máis polo miúdo, concretaranse posibles nichos de mercado e as oportunidades que estes cambios crean no territorio: economía sustentable, dixitalización, Obxectivos de Desenvolvemento Sostible (ODS), saber tradicional, produto local, igualdade de oportunidades, asentamento de poboación feminina e da mocidade, entre outros. Exporanse exemplos de como formular un DAFO para un enfoque dos nichos de mercado máis óptimos e coñecerán estratexias para levar a cabo modelos de negocio.

As persoas interesadas xa poden anotarse para asistir a este webinario desde o formulario dispoñible na páxina web da Deputación de Pontevedra.