ESIXEN SOLUCIÓNS Á SOBRECARGA DE TRABALLO NA LIÑA DE MONTAXE 2

Os sindicatos preparan a folga deste xoves na planta de Balaídos

Os sindicatos CIG, CCOO e UGT van realizar este mércores 15 de maio, asembleas de traballadores nas tres quendas laborais das liñas de montaxe, naves e ferraxe para informar e preparar a xornada de folga convocada para o xoves para esixir solucións á sobrecarga de traballo na montaxe, en especial na liña 2.

Os sindicatos preparan a folga deste xoves na planta de Balaídos
Traballadores na planta de PSA en Vigo./V.CAMESELLE.
Traballadores na planta de PSA en Vigo./V.CAMESELLE.

As tres organizacións sindicais lembran que levan preto de cinco meses solicitando medidas para que o persoal de montaxe teña mellores condicións nos postos de traballo, sen que até o momento a dirección teña adoptado ningún tipo de solución. E así llo volveron recordar na reunión extraordinaria mantida este luns co director do centro, que se limitou a apelar ao 'diálogo e á reflexión'.

Neste senso, a representación de CIG, CCOO e UGT defende tamén a reflexión e o diálogo pero critica a esterilidade destes encontros "xa que a dirección segue sen querer abordar a creación de postos, a redución das cargas de traballo, a recuperación de operacións externalizadas, a falla dun mapa de postos esixentes fisicamente ou a ausencia dunhas rotacións que sirvan para evitar lesións".

De feito, critican que fora necesario ter enriba da mesa unha convocatoria de folga para que a dirección recoñecera publicamente que hai sobrecarga de traballo na liña 2. Por iso, reiteran a súa disposición ao diálogo, mais insisten en que non van desconvocar a folga do día 16 "porque non nos podemos fiar das boas palabras de quen leva catro meses demorando a posta en marcha de medidas urxentes para mellorar as condicións laborais. Queremos feitos e querémolos xa".

A este respecto, urxiron a dirección a buscar solucións inmediatas "se non queren atoparse con outra convocatoria de folga para a semana que vén".

A sección sindical da CUT na fábrica de PSA Vigo tamén secundará a folga convocada polos outros tres sindicatos.

Comentarios
Os sindicatos preparan a folga deste xoves na planta de Balaídos