Incorpora o o Centro de Investigacións Forestais de Lourizán e créase unha Comisión de coordinación da industria e dos recursos forestais
A Axencia Galega de Industrias Forestais incorpora novos recursos e servizos
![A conselleira de Economía e Industria, María Jesús Lorenzana (3ª pola der.) no Serradoiro de Tuiriz, en Pantón./CEDIDA XUNTA.](/asset/thumbnail,992,558,center,center/media/economiaengalicia/images/2024/05/21/2024052120235480902.jpg)
María Jesús Lorenzana fixo este anuncio durante unha visita ao Serradoiro de Tuiriz, en Pantón (Lugo), unha empresa que leva case 60 anos no sector da primeira transformación da madeira e que a conselleira de Economía e Industria cualificou como “modelo” pola súa dixitalización, eficiencia enerxética e a incorporación de enerxía fotovoltaica, así como pola súa aposta por unha comercialización do recurso con venda en liña.
Segundo o decreto aprobado este lunes polo Consello da Xunta, a partir de agora, para mellorar a coordinación dos centros de investigación en materia forestal, a Axencia Galega de Industrias Forestais (Xera) vai incorporar o Centro de Investigacións Forestais de Lourizán, que se suma ao CIS-Madeira (San Cibrao das Viñas, Ourense), xa integrado. Para dirixir este último, créase unha xefatura de servizo dependente da Área de Innovación Forestal.
En segundo lugar, vaise poñer en marcha a Área de Información forestal, que será a encargada da creación e mellora de sistemas de información e estatística forestal de Galicia, que permitan facer diagnoses adecuadas e que serán unha ferramenta esencial para a toma de decisións de políticas públicas ou empresariais relacionadas co sector forestal e da madeira.
Xunto con isto, crearase, tamén, unha Comisión de coordinación da industria e dos recursos forestais para garantir a axeitada coordinación entre ambos os dous eidos de actuación. Nesta comisión participará persoal das consellerías de Economía e Industria e do Medio Rural; nomeadamente, da Axencia Galega da Industria Forestal e da Dirección Xeral de Planificación e Ordenación Forestal, que poderán estar asistidas por técnicos e expertos.
Mesmas funcións e obxectivos
O órgano encargado da política industrial forestal en Galicia, cambia na estrutura interna da Xunta pero as súas funcións e obxectivos non varían. Seguen sendo proseguir natarefa de incrementar a competitividade do sector forestal-madeira. De feito, as liñas de actuación irán orientadas, como ata o de agora, a aumentar o valor do recurso utóctono; mellorar a profesionalización e cualificación do capital humano para o manexo no sector de tecnoloxías máis avanzadas; desenvolver novos procesos, produtos e usos da madeira; e, todo iso, desde a máxima coordinación cos centros de investigación en materia forestal.
A conselleira de Economía e Industria apuntou que este sector que crea preto do 2% do emprego total en Galicia, e que o conxunto de ramas industriais da cadea forestal-madeira están contribuíndo desde 2016 a unha achega estable de, polo menos, o 12% do emprego industrial. A isto hai que sumarlle que Galicia conta cunha superficie forestal de máis de 2 millóns de hectáreas, con todo o que iso supón para as empresas e familias que viven da produción e comercialización de produtos forestais e transformados da madeira.