Esta liña de axudas, que se enmarca no Plan Galego de Formación para o Emprego , está destinada a empresas, soas ou agrupadas temporalmente, ou entidades e titulares de centros inscritos para impartir formación profesional para o emprego na comunidade.

As accións formativas, que inclúen ata 290 actuacións, impartiranse en modalidade presencial ata o próximo 29 de novembro de 2024, e para iso, os participantes deberán estar rexistrados como demandantes no Servizo Público de Emprego de Galicia e non estar ocupados na data de inicio dos cursos.

Por outra banda, o finaciamento destas unidades formativas inclúe un compromiso de contratación de polo menos o 60% do alumnado entre seis e doce meses e do 40% no caso de relacións laborais de maior duración.

A contía das achegas que se concederán ás entidades calcularase en función do custo da formación na especialidade impartida, da duración en horas e do número de participantes previstos. A presente convocatoria inclúe a posibilidade de impartir novos módulos transversais de manipulador de alimentos e o básico de prevención de riscos laborais.

O prazo de presentación de solicitudes estará aberto dende este luns e ata o próximo 30 de setembro.

Con esta liña de axudas o Goberno galego promove a mellora da empregabilidade da cidadanía, á vez que contribúe a adaptar a cualificación das persoas traballadoras para favorecer a competitividade do tecido produtivo.