Tanto a Universidade da Coruña (UDC) como a Fundación Olidís plantexan como obxectivo estratéxico profundar nos estudos sobre os aceites relacionados coa economía circular en aplicacións cosméticas, farmacolóxicas e enerxías, entre outras; así como a súa vinculación con auga mariña e algas.

O reitor da UDC xustificou a creación desta nova Cátedra Juan Luque: economía circular sobre o aceite como o froito da intensa relación da universidade coa empresa. “Somos unha universidade que nos gusta estar preto do sector empresarial e industrial porque cremos na coxeneración de coñecemento”, explicou Julio Abalde, subliñando o interese das dúas institucións por innovar e formar no campo da economía circular.

A Fundación Olidís tamén puxo de relevo o aspecto innovador desta Cátedra que terá a súa sede na factoría de elaboración de produtos cosméticos a base de aceite, auga de mar e algas que está proxectando en San Cibrao, no concello lugués de Cervo.

O profesor da UDC Manuel  Becerra, coordinador do Máster Universitario en Biotecnoloxía Avanzada con mención de excelencia da Xunta, será o novo director desta Cátedra que contará cun financiamento anual de 30.000 euros aportados pola Fundación Olidís.