Imprimir

Leandro Llorente, I Premio Internacional de Investigación en Innovación e Economía Circular

Redacción Economía en Galicia | 07 de febrero de 2019

Leandro Llorente recibiu o I Premio Internacional de Investigación en Innovación e Economía Circular.
Leandro Llorente recibiu o I Premio Internacional de Investigación en Innovación e Economía Circular.

O I Premio Internacional de Investigación en Innovación e Economía Circular recaeu en Leandro Llorente González polo seu traballo ‘Economía circular e comercio de materiais reciclables na Unión Europea’.

O xurado internacional encargado da valoración dos distintos traballos presentados a este galardón promovido polo mestrado en Desenvolvemento Económico e Innovación (DEIN) da Universidade de Santiago co patrocinio da Deputación da Coruña, destacou a súa “orixinalidade, calidade, actualidade, relevancia e proxección de futuro”.

O decano da Facultade de Ciencias Económicas e Empresariais, Xoán Ramón Doldán García, presidiu a entrega do premio nun acto que contou coa presenza do presidente da Deputación da Coruña, Valentín García Formoso, e do presidente do xurado e coordinador do Máster en Desenvolvemento Económico e Innovación (DEIN), Xavier Vence.

Na mesma sesión tamén se fixo entrega dunha mención especial a Eduarne Suárez Lejardi polo traballo ‘Recycling discarded fishing nets as concrete reinforcement’, do que o xurado destacou a súa calidade e actualidade. Nel investiga o uso de fibras de redes de pesca descartadas no océano como reforzo para formigón armado. 

Baixo nivel de circularidade nas economías europeas

O traballo de Leandro Llorente pretendía realizar unha contribución empírica ao estudo da economía circular (EC) europea dende unha perspectiva territorial. Para logralo estudou algunhas das principais fontes de datos dispoñibles sobre a temática a nivel dos distintos Estados membro da Unión Europea.

Segundo o seu autor, os datos analizados testemuñan un baixo nivel de circularidade nas economías da UE. “Os maiores avances en termos de crecemento da EC e converxencia entre os Estados obsérvanse nos indicadores sobre a xestión de residuos e, en particular, na reciclaxe”, explica Leandro Llorente. O mesmo traballo tamén destaca unha “escasa contribución dos materiais reciclados á demanda de materias primas, ao igual que unha reducida taxa de utilización de materiais reciclados por parte das economías europeas”.

Os indicadores relativos á medición dos recursos destinados á EC deron mostra “do reducido peso que as actividades de reciclaxe e reutilización teñen en xeral nas economías europeas”. O autor alude a unha “correlación negativa entre a participación destas actividades e o PIB per capita dos Estados membro, á vez que varios dos países líderes en reciclaxe presentan unha escasa participación da EC en termos de emprego”.

O premio

Este premio é unha iniciativa organizada no marco do convenio do Master DEIN coa Deputación da Coruña para promover e dar visibilidade á investigación en innovación e economía circular no ámbito académico. Os seus organizadores destacaron a alta concorrencia de autores de diferentes países e a elevada calidade de todos os traballos presentados. 

Puede ver este artículo en la siguitente dirección /articulo/eventos/leandro-llorente-premio-internacional-investigacion-innovacion-economia-circular/20190207184039009609.html


© 2019 Economía en Galicia

Contacto: [email protected] - [email protected]  

Aviso legal