Imprimir

A CIG protesta contra os recortes laborais e nos servizos de caixa en Abanca e BBVA

Redacción Economía en Galicia | 11 de junio de 2020

Delegados da CIG protestan diante da oficina de Abanca na rúa Nova da Coruña.
Delegados da CIG protestan diante da oficina de Abanca na rúa Nova da Coruña.
As seccións sindicais da CIG no BBVA e en Abanca realizaron este xoves concentracións en oficinas das dúas entidades bancarias na Coruña para denunciar "os abusos patronais" e os "recortes de servizos á clientela que ambas empresas están a impor aproveitando a situación de emerxencia sanitaria".

A primeira protesta tivo lugar na oficina do BBVA do Cantón Pequeno para denunciar o recorte ou eliminación do servizo de caixa decretado pola entidade durante a pandemia, mais que xa comunicou que se manterá de maneira permanente. "Estamos ante unha reestruturación que non foi nin comunicada nin negociada previamente coa representación social, a pesar de que afecta ao emprego, a distribución do tempo de traballo, aos salarios e ás funcións", subliñou Miguel Fernández,  secretario da sección sindical da CIG.

Neste senso, avanzou que esta dixitalización forzosa da clientela afectará ao emprego, xa que naquelas oficinas nas que restrinxe o horario de atención ou se eliminan as caixas, "haberá unha redución dos postos de traballo e o persoal terá que facer máis funcións de carácter comercial".

Esta recorte do horario, engadiu Fernández,  implica que a atención en caixa só se presta até ás 11 horas e o resto do tempo as xestións teranse que facer a través da banca dixital ou do caixeiro, forzando así as clientas e clientes ao autoservizo. “Esta decisión claramente supón un prexuízo para as persoas maiores, que teñen menos coñecemento das novas tecnoloxías, levando a moitas delas á exclusión financeira”, alertou.

Abanca suprimiu o rexistro da xornada aproveitando a crise sanitaria

A seguir, os delegados da CIG trasladaron a protesta a diante da oficina principal de Abanca na Rúa Nova. Aínda que nesta entidade tamén se comparte a problemática da redución  dos horarios de caixa, coa mobilización quixéronse pór a atención "nos recortes de dereitos, nos despedimentos en Caixa Geral, ou na negativa de Abanca a prorrogar a negociación do convenio colectivo".

Clodo Montero, secretario da sección sindical da CIG, subliñou que co gallo da pandemia, Abanca suprimiu o rexistro horario, obrigando o persoal a realizar horas extra para atender o aumento da carga de traballo "que non se computan e polo tanto nin se cotizan á Seguridade Social, nin se pagan, nin se compensan".

Xunto a isto, Montero rexeitou a actuación da dirección de Abanca que, en pleno estado de alarma, reactivou a negociación dun "ERE encuberto para 250 traballadores de Caixa Geral e dunha modificación da substancial das condicións  de traballo, que entre outras cuestións mudou os horarios laborais do persoal".  

 

Puede ver este artículo en la siguitente dirección /articulo/economia/cig-protesta-recortes-laborais-nos-servizos-caixa-abanca-bbva/20200611184930014360.html


© 2020 Economía en Galicia

Contacto: [email protected] - [email protected]  

Aviso legal