O proxecto GEMA (GEstión de la MovilidAd) foi financiado pola Axencia Galega de Innovación

Un proxecto coordinado por CITIC desenvolve tres aplicacións para mellorar a xestión da mobilidade dos traballadores

O proxecto GEMA (GEstión de la MovilidAd), liderado polo Centro de Investigación TIC (CITIC) da Universidade da Coruña, logrou desenvolver tres aplicacións funcionais destinadas a mellorar a xestión da mobilidade dos traballadores, así como unha ferramenta capaz de automatizar a creación de novas aplicacións de mobilidade.
Un proxecto coordinado por CITIC desenvolve tres aplicacións para mellorar a xestión da mobilidade dos traballadores
A investigadora do CITIC Nieves R. Brisaboa deu conta dos resultados do proxecto GEMA.
A investigadora do CITIC Nieves R. Brisaboa deu conta dos resultados do proxecto GEMA.

Así o expuxo a coordinadora xeral do proxecto GEMA, a investigadora do CITIC Nieves R. Brisaboa, no acto de presentación de resultados que tivo lugar este venres no CITIC da UDC.

O proxecto comezou a súa andadura en abril de 2019 e rematou a finais de 2020. Esta iniciativa tivo o obxectivo de axudar ás empresas a mellorar a súa xestión da mobilidade a través da planificación das rutas. Así, participaron tres empresas que contan con traballadores que realizan o seu traballo desprazándose. Son GESUGA (Gestora de subproductos de Galicia), AO Mayores Servicios Sociales e Taprega Prevención de Riesgos.

O equipo do CITIC deseñou unha aplicación funcional para cada unha delas. Ademais, colaborou no proxecto Enxenio, unha empresa de software que tiña o fin de desenvolver unha ferramenta para automatizar a posta en marcha de aplicacións de xestión da mobilidade. Deste xeito, os catro retos tecnolóxicos que abordou o proxecto GEMA foron a planificación, seguimento, almacenamento e explotación de rutas, axendas e horarios; o seguimento de traballadores en mobilidade, a anotación da súa traxectoria e detección automática da súa actividade; o almacenamento e explotación de traxectorias; e o desenvolvemento automatizado de aplicacións de xestión de traballadores en mobilidade.

A coordinadora xeral do proxecto, Nieves R. Brisaboa, confirmou que “se lograron todos os obxectivos do proxecto, a pesar de que a pandemia dificultou as actividades”, debido á imposibilidade de acceso á residencia Mayores e á interrupción de determinadas tarefas en GESUGA e Taprega. A investigadora indicou que “dende o CITIC seguiremos comprometidos cos traballos de investigación, depurando e mellorando as estruturas de datos e os algoritmos desenvolvidos”. Tamén sinalou que, pola súa banda “as empresas seguirán facendo a paulatina integración dos prototipos no seu día a día”.

O proxecto GEMA foi financiado pola Axencia Galega de Innovación (GAIN) e conta co apoio da Consellería de Economía, Emprego e Industria e confinanciamento do Fondo Europeo de Desenvolvemento Rexional (FEDER) no marco do programa operativo FEDER Galicia 2014- 2020.

Comentarios
Un proxecto coordinado por CITIC desenvolve tres aplicacións para mellorar a xestión da mobilidade dos traballadores