Informe sobre a Economía Social en Galicia 2019

Cooperativas e sociedades laborais xeran o 5% do PIB galego

Cooperativas e sociedades laborais representan o 5% do PIB galego, podendo chegar ao 7% ao sumar outro tipo de entidades, segundo constata o Informe sobre a Economía Social en Galicia 2019, presentado este venres na Facultade de Ciencias Económicas e Empresariais da Universidade de Santiago (USC).
Cooperativas e sociedades laborais xeran o 5% do PIB galego
Participantes na presentación do  Informe sobre a Economía Social en Galicia 2019, presentado este venres na Facultade de Ciencias Económicas e Empresariais da USC.
Participantes na presentación do Informe sobre a Economía Social en Galicia 2019, na Facultade de Ciencias Económicas e Empresariais da USC./C.PAZ.

Baixo a dirección de Maite Cancelo e Manuel Botana, directora e presidente, respectivamente, do Comité Científico do Centro de Estudos Cooperativos de Galicia (CECOOP) da Universidade de Santiago, o documento enmárcase “na presenza cada vez máis consolidada no panorama económico e político europeo, español e galego da economía social”, explican os seus autores.

No ano 2019, tal e como evidencia o informe, creáronse 56 novas cooperativas en Galicia, o que supuxo un crecemento do 4,1%. “O peso do cooperativismo galego no conxunto de España, segundo o número de cooperativas inscritas na Seguridade Social, representa o 4% do total”, sinalan os autores do informe. Case sete das dez novas cooperativas activas localízanse nas provincias atlánticas e máis do 74% das rexistradas neste ano o fan baixo a figura de traballo asociado. Finalmente, o informe destaca a concentración de actividade das cooperativas en torno a tres actividades: construción; actividades profesionais, científicas e técnicas, e comercio. En total, no ano analizado, Galicia rexistra 1.390 cooperativas.

Con respecto ás sociedades laborais, a Comunidade rexistrou 79 menos con relación ao ano anterior, quedándose cun total de 1.478.  A maioría das sociedades laborais galegas exercen a súa actividade nos servizos (68,3%), seguida pola industria (17,5%), construción (12,3%) e agricultura (1,9%). A súa antigüidade media é de 15,6 anos, aínda que as que operan na industria acadan os 17,3. As sociedades con máis idade atópanse en Lugo, sobre todo na industria (21 anos) e na agricultura (18,1 anos). Segundo os datos do Ministerio, as SLAB galegas representan o 5,4% do total estatal e a mesma tendencia á baixa cunha caída do 6%. En termos de emprego, a perda en Galicia foi de 312. A pesar da tendencia, no ano 2019 constituíronse 33 novas sociedades laborais, 29 no sector servizos e dúas tanto na construción como na industria.

Os 111 centros especiais de emprego son sete menos que no ano anterior, mentres que aumentan en dúas as empresas de inserción, sendo doce no último ano. 63 confrarías, 1.124 sociedades agrarias de transformación, 3.200 comunidades de montes veciñais en man común, e as catro mutuas completan o mapa da economía social en Galicia.

Os valores da economía social

Alén da profesora Cancelo, no acto de presentación do Informe, ; así como a conselleira de Emprego e Igualdade, María Jesús Lorenzana, quen destacou que a economía social conta cunha maior capacidade de resistencia, o que ten permitido a supervivencia dun maior número de empresas nas últimas crise económicas e amosa “o papel clave que xoga á hora de mitigar o impacto que a covid-19 está a xerar”, engadiu Lorenzana.

A conselleira tamén puxo en valor os valores que incorpora a economía social, “os que fan que sexan entidades de interese para toda a sociedade”, apuntou. Así, afirmou que a economía social conforma un modelo de crecemento máis sostible, máis inclusivo e máis igualitario ao priorizar as persoas sobre o capital, crear empregos de calidade, integrar aos colectivos de difícil empregabilidade, aplicar fórmulas de goberno democráticas, e contribuír á cohesión social e territorial, entre outros.

Lorenzana recordou que a Administración galega está a investir este ano 33 millóns de euros en apoio á economía social, un 22% más que en 2020.

Na presentación deste estudo tamén tomaron parte tomaron parte o vicerreitor de Estudantes e Proxección Internacional da USC, Víctor Arce, o decano da Facultade de Ciencias Económicas e Empresariais, Xoán Doldán; e o presidente do Foro pola Economía Social Galega, Celso Gándara.

Dolores Álvarez, María Bastida, Manuel Botana, Maite Cancelo, M. Rosarío Díaz-Vázquez, Pilar Expósito, Rafael Millán, José Antonio Montero, Ana Olveira, Alberto Vaquero, Loreto Fernández, Miguel Ángel Vázquez Taín e Emilia Vázquez son os autores do estudo.



 

Cooperativas e sociedades laborais xeran o 5% do PIB galego