O OBXECTIVO É COÑECER AS PROPOSTAS DOS DISTINTOS AXENTES PRESENTES NA COMARCA PARA O FUTURO DO TERRITORIO DA DENOMINACIÓN

A Fundación Juana de Vega celebra un novo encontro na DO Rías Baixas

A Fundación Juana de Vega continúa na Denominación de Orixe Rías Baixas co proceso de participación no marco da “Estratexia de dinamización económica, territorial e turística das comarcas vitivinícolas de Galicia”.

A Fundación Juana de Vega celebra un novo encontro na DO Rías Baixas
Reunión da Fundación Juana de Vega na  DO RÍAS BAIXAS
Reunión da Fundación Juana de Vega na DO RÍAS BAIXAS

A “Estratexia de dinamización económica, territorial e turística das comarcas vitivinícolas de Galicia”, froito dun convenio entre a Fundación Juana de Vega, Agader, a Axencia Turismo de Galicia e o Igape, ten por obxectivo mellorar o posicionamento dos viños galegos no seu conxunto, reforzar a súa imaxe de marca vinculada cos territorios nos que se producen e mellorar a eficacia da promoción e comercialización dos produtos turísticos vinculados ao enoturismo e a enogastronomía.

O proceso de participación iniciouse na DO Rías Baixas no mes de decembro, cando se recolleron os principais problemas e retos do territorio nos eidos de produción, industria e comercialización, turismo e enoturismo, patrimonio cultural e paisaxístico. Nesta segunda fase, o encontro tivo un carácter máis propositivo recollendo as achegas dos distintos axentes e as medidas concretas a incluír na estratexia para poder reforzar aqueles aspectos positivos ou solucionar aquelas problemáticas identificadas no encontro inicial.

O encontro propositivo tivo lugar no Pazo de Mugartegui en Pontevedra e nela participaron diversas organizacións e institucións cuxo ámbito de actuación coincide prioritariamente co territorio da DO, tanto relacionadas directamente co sector vitivinícola, como do sector turístico, das administracións públicas e doutros axentes do territorio: viticultores, adegas, Consello Regulador, rutas do viño, empresas de turismo, hostaleiros, concellos, Grupos de Desenvolvemento Rural, entre outros.

No encontro presentáronse os principais eixos cos que se está a traballar na elaboración da estratexia: viticultura e produción de uva, industrias e tipos de viños elaborados, comercialización e mercados, organización da cadea do viño e funcionamento da DO, turismo e enoturismo, patrimonio natural, cultural e paisaxe.

A este encontro en Pontevedra, precedeulle o que tivo lugar en Valdeorras, a semana pasada e seguiranlle outros tres similares nos outros territorios vitivinícolas que existen en Galicia, en Monterrei o 24 de marzo, na Ribeira Sacra o 26 de marzo, no Ribeiro, o 1 de abril, e coas IXPs o 16 de abril.

Alcance do sector vitivinícola

O sector vitivinícola converteuse nun dos sectores máis dinámicos do rural galego, aglutinando nas súas cinco Denominacións de Orixe, a máis de 13.000 viticultores, unhas 450 adegas e un valor económico de máis de 200 millóns de euros. O viño é por tanto un importante dinamizador nas comarcas de Galicia que están ligadas a estas Denominacións de Orixe, creando fortes vínculos entre agricultura, patrimonio, paisaxe, gastronomía, cultura e turismo.

Comentarios
A Fundación Juana de Vega celebra un novo encontro na DO Rías Baixas