Caixa Rural Galega acada un beneficio neto de 5,75 millóns de euros

A asemblea xeral de Caixa Rural Galega vén de aprobar as contas anuais de 2020, no que a entidade logrou un beneficio neto de 5,75 millóns de euros, cifra que supera lixeiramente a de 2019 e que supón sete anos consecutivos con incremento de resultados.

Caixa Rural Galega acada un beneficio neto de 5,75 millóns de euros
Asemblea xeral anual de Caixa Rural Galega.
Asemblea xeral anual de Caixa Rural Galega.

Caixa Rural Galega celebrou a súa asemblea xeral anual o pasado sábado 3 de xullo coa presenza do consello reitor da cooperativa de crédito e os representantes das xuntas preparatorias celebradas durante estas últimas semanas nas localidades de Chantada, Ribadeo, Santiago de Compostela e Lugo marcadas, ao igual que no ano 2020, polas medidas de protección contra o covid-19.

As contas de 2020 recollen uns activos que acadan case os 1.500 millóns de euros e que supoñen un crecemento do 23% respecto do ano anterior. Os depósitos de clientes supoñen case 1.280 millóns de euros e a inversión crediticia acada os 690 millóns de euros, o que supón para ambas partidas crecementos do 18% e do 24% respectivamente. A entidade pechou o exercicio cunha ratio de morosidade do 3,51% continuando a súa tendencia á baixa, en clara recuperación tras os anos máis difíciles da recente crise, e pese ás incertezas provocadas pola pandemia e o intenso retroceso do PIB no ano 2020. A ratio de solvencia acada o 14,29% cumprindo, como en anos anteriores, os requirimentos do regulador.

Nomeamento de vicepresidente e valoración do presidente

Tamén estaba na orde do día a elección de vicepresidente pola baixa do anterior, Venancio Rocha, que deixou o consello reitor de xeito voluntario tras máis de trinta anos de presenza no mesmo. Sempre vinculado ao mundo agrario e rural, Venancio Rocha ostentou cargos tan destacados como a presidencia da Cooperativa Os Irmandiños, a da Asociación Galega de Cooperativas Agroalimentarias (AGACA), ou a vicepresidencia do Consello Galego de Cooperativas, entre outros. Resultou elixido para o cargo Ángel Ramil Castelo, membro do Consello Reitor desde o ano 2002 e actual Secretario do Consello Regulador da Denominación de Orixe Protexida San Simón da Costa.

O presidente de Caixa Rural Galega, Manuel Varela, cualificou o exercicio 2020 como exitoso, acadando niveis de crecemento nunca antes vistos na entidade, pese ás dificultades da pandemia con retrocesos históricos do PIB e á persistencia de tipos negativos que dificultan a rendibilidade da actividade e cando aínda non se cicatrizaron as feridas da anterior crise. Con todo, manifestou a súa confianza en que a segunda metade de 2021 sexa a da volta á normalidade e que se poida deixar atrás o pesadelo da pandemia. O Presidente aproveitou, ademais, para agradecer expresamente o esforzo de todos os profesionais que forman o equipo humano de Caixa Rural Galega, tras un ano de enormes dificultades.

Así, a entidade afronta o futuro con optimismo por canto os niveis de crecemento veñen corroborar que o modelo de banca cooperativa que esta propón, apoiándose nun equilibrio entre a dixitalización e a atención persoal da súa rede de oficinas, segue a ser unha proposta ben acollida entre os galegos e galegas.

Comentarios
Caixa Rural Galega acada un beneficio neto de 5,75 millóns de euros