O espazo coworking A Estación de Vedra será a sede, o vindeiro 28 de abril, do primeiro de tres foros destinados a promover o emprendemento no rural. O 12 de maio será o turno para o evento de Oleiros (no Pazo de Arenaza) e finamente en xuño, o día 8, o evento chegará ao espazo colaborativo Transformando Brión.

Segundo explican os seus promotores, nestes eventos os asistentes poderán desfrutar de “espazos de conexión” e “compartir experiencias e proxectos” de emprendedores no rural da provincia da Coruña. Asemade, os foros sevirán como espazos para “a creación e xeración de ideas que den solución de emprendemento a retos nos municipios con menos habitantes”.

As tres citas co emprendemento seguirán un mesmo guión: en primeiro lugar, a actividade de “Olla a Presión con profesionais”, que irá seguida de dúas mesas sobre emprendemento no rural, a primeira centrada no emprendemento feminino e a segunda sobre os retos aos que se enfrontan os emprendedores no mundo rural e as estratexias para resolvelos.

A estas tres actividades poden asistir todas as persoas que estean interesadas en emprender e aquelas outras que cumpran os requisitos do programa PEL da Deputación da Coruña. O horario será, nas tres citas, de 9 a 14 horas, e as inscricións poden realizarse neste enlace.

Axenda Emprende

O Foro de Emprendemento no Rural é unha das primeiras actividades da Axenda Emprende do proxecto PEL. Esta axenda inclúe, ata final de ano, píldoras formativas, accións formativas para persoas desempregadas, encontros intercomarcais, encontros entre alumnado e o tecido empresarial, eventos de captación de talento ou un congreso de innovación social para o emprego, entre outros eventos.