O SÁBADO 25 VOLTARÁ HABER ASEMBLEA DE TRABALLADORES

Unha manifestación sumarase ao paro deste martes en Pescanova

O cadro de persoal de Nueva Pescanova celebrará unha manifestación este martes en Vigo coincidindo coa segunda xornada de folga para reclamar "uns convenios colectivos dignos".

Unha manifestación sumarase ao paro deste martes en Pescanova
Rolda de prensa dos representantes sindicais en Nueva Pescanova./CIG.
Rolda de prensa dos representantes sindicais en Nueva Pescanova./CIG.

A manifestación arrincará de Vía Norte ás 10.00 horas e rematará na zona dos bancos no cruce de Colón, xa que as entidades crediticias “tamén son responsábeis da situación de conflitividade laboral que se vive na compañía”.

A marcha coincidirá coa segunda xornada de folga en Nueva Pescanova, despois do “éxito” que, salientan, tivo a celebrada o martes 14, que foi secundada pola práctica totalidade do cadro de persoal de elaboración e frigoríficos dos centros de traballo de Chapela e do Porriño, paralizando por completo a actividade na empresa.

Os representantes sindicais de CIG, CUT, UGT e USO adiantaron que a partir de agora intentarán darlle “eco social” a un conflito que “non é unicamente polo convenio de Pescanova, senón que ten que ver coa defensa das condicións laborais do conxunto do sector da Alimentación”. Así, promoverán o apoio solidario tanto dos Concellos de Redondela e do Porriño como dos comerciantes destas localidades, para o que repartirán carteis entre os establecementos.

O vindeiro sábado 25 haberá unha nova asemblea cos empregados para analizar o resultado das dúas xornadas de folga e decidir se a folga pasa a ser indefinida a partir do 4 de abril. 

Comentarios
Unha manifestación sumarase ao paro deste martes en Pescanova