Convenio de colaboración entre Universidade e Asociación de Empresarios

Estudantes da Universidade de Vigo poderán realizar prácticas nas empresas do Polígono de San Cibrao

O reitor da Universidade de Vigo, Salustiano Mato, e o presidente da Asociación de Empresarios do Polígono de San Cibrao, Elías Mera, veñen de asinar un convenio marco de colaboración entre ambas as dúas entidades.

Estudantes da Universidade de Vigo poderán realizar prácticas nas empresas do Polígono de San Cibrao
Salustiano Mato, Elías Mera e Virxilio Rodríguez, na sinatura do acordo. /DUVI.
Salustiano Mato, Elías Mera e Virxilio Rodríguez, na sinatura do acordo. /DUVI.

O obxectivo deste convenio é “ofrecer un marco de colaboración que nos permita avanzar xuntos”, explicou o reitor da Universidade de Vigo durante a sinatura do acordo, no que estivo acompañado polo vicerreitor do campus de Ourense, Virxilio Rodríguez.

Salustiano Mato remarcou que con esta iniciativa o que se pretende é “achegármonos ao territorio e aos empresarios”, levando a cabo iniciativas que permitan ao alumnado “prepararse mellor para mergullarse no mercado laboral” e desenvolvendo iniciativas formativas, de investigación e transferencia “que abran oportunidades de desenvolvemento para o territorio”.

Pola súa banda, Elías Mera destacou que coa sinatura deste convenio ábrese unha “conexión leal, permanente e exemplar entre as empresas e a Universidade de Vigo”. O presidente da Asociación de Empresarios do Polígono de San Cibrao subliñou como “para o colectivo que represento é un orgullo poder planificar coa Universidade de Vigo fórmulas creativas de cooperación e vínculos estreitos en beneficio da comunidade educativa e das propias empresas”. “Fainos unha ilusión especial contribuír na orientación laboral e profesional dos universitarios, e máis nestes tempos de forte especialización das universidades. E tampouco oculto que os empresarios temos moitas esperanzas postas nos resultados das iniciativas deste convenio que buscan a conexión entre perfiles académicos e laborais. Os beneficios serán mutuos”, recalcou o presidente da entidade empresarial.

Contido do acordo

O propósito do convenio asinado é a realización de actividades e proxectos de forma conxunta en todo tipo de asuntos que resulten de interese para as institucións implicadas. Entre as actividades apuntadas no convenio como de interese están promover e facilitar a realización de prácticas curriculares ou extracurriculares de alumnado en empresas integradas na Asociación de Empresarios do Polígono de San Cibrao. Tamén se sinala a colaboración de empresarios desta asociación cos responsables de practicum en temas de orientación, co obxectivo de informar sobre os intereses e perfiles profesionais que demandan as empresas. A acollida de alumnado para a realización de traballos de fin de grao e fin de mestrado e a posta en marcha dun protocolo para a realización de visitas a empresas por parte dos estudantes son outras das medidas referidas no acordo. 

Ademais, o convenio sinala outras actividades de interese posibles, como o desenvolvemento de proxectos de investigación; a realización conxunta de xornadas; a elaboración dun catálogo de cursos que cubra carencias de formación detectadas nas empresas; a realización dunha listaxe de empresas con convenio de cooperación educativa coa universidade; a participación das empresas en presentacións específicas do sector e a participación dos centros nas empresas no mesmo senso e aumentar a visibilidade da asociación nas páxinas web dos centros e/ou nos sitios que sexan axeitados para tal fin.

Unha comisión mixta con representantes da Universidade e da Asociación será a encargada de planificar, facer seguimento e avaliar as accións que se orixinen a raíz deste convenio marco, que terá unha duración de catro anos, sendo prorrogable.

Estudantes da Universidade de Vigo poderán realizar prácticas nas empresas do Polígono de San Cibrao