Un 5,4% máis que en 2017

A Xunta eleva o seu teito de gasto para 2018 ata os 9.487 millóns de euros

O Consello da Xunta aprobou este venres o teito de gasto non financeiro para o 2018, que será de 9.487 millóns de euros. Esta cifra é un 5,4% superior á de 2017, de tal xeito que a Administración autonómica disporá de 490 millóns de euros máis.

A Xunta eleva o seu teito de gasto para 2018 ata os 9.487 millóns de euros
O titular do Goberno galego, Alberto Núñez Feijóo, comparecerá en rolda de prensa para dar conta dos asuntos tratados na reunión do Consello. Na sala de prensa de Consello.
foto xon crespo
28/07/17
O titular do Goberno galego e o conselleiro de Facenda, na rolda de prensa tralo Consello da Xunta./X.CRESPO

Durante a rolda de prensa posterior ao Consello da Xunta, Feijóo explicou que Galicia é a primeira comunidade que aproba o seu teito de gasto para o ano que vén, tras a xuntanza deste xoves do Consello de Política Fiscal e Financeira, o que constitúe un paso imprescindible de cara á aprobación dos Orzamentos. Nese senso, o titular autonómico lembrou que o noso é o único territorio que ten aseguradas as súas contas para 2018. “O Goberno galego non será unha fonte de incerteza”, destacou Feijóo, grazas á estabilidade política da que goza a Comunidade.

O presidente da Xunta quixo poñer en valor a importancia dunha xestión responsable para poder sacar adiante este teito de gasto e, en consecuencia, aumentar os investimentos e “manter os servizos públicos con máis ambición” de cara ao ano que vén. Non en van, Galicia é a autonomía que menos aumentou a débeda pública desde 2009, o que permitirá que o incremento real da capacidade de gasto sexa aínda maior que o previsto, debido á redución dos gastos financeiros. Grazas a isto, a Comunidade xa recuperou a metade da capacidade de investimento que perdera durante a crise e dispón de 1000 millóns de euros máis que hai catro anos.

Novas previsións de crecemento

O titular do Goberno galego tamén anunciou unha nova revisión á alza das previsións de crecemento para este ano e o que vén, que se sitúan no 3,1% e no 2,7%, respectivamente, en ambos os casos por riba da media española. 

Pola súa parte, o conselleiro de Facenda, Valeriano Martínez, destacou que o teito de gasto para 2018 aprobado hoxe é rigoroso, ao tempo que vai na liña da folla de ruta marcada no Plan estratéxico de Galicia 2015-2020. Este límite de gasto “reforza a creación de emprego e o investimento, e consolida un modelo de crecemento san que permite a Galicia crecer mellor”, sinalou.

Comentarios
A Xunta eleva o seu teito de gasto para 2018 ata os 9.487 millóns de euros