ANOTA UN 3,4% EN SETEMBRO

O último Indicador Abanca-Foro de Conxuntura confirma a "leve" desaceleración da economía galega

O Indicador Abanca-Foro de Conxuntura Económica, que elabora o Foro Económico de Galicia, experimentou un crecemento interanual do 3,4% no mes de setembro.

O último Indicador Abanca-Foro de Conxuntura confirma a "leve" desaceleración da economía galega
En termos interanuais o mellor comportamento anótase nas vivendas a construír.
En termos interanuais o mellor comportamento anótase nas vivendas a construír.

A cifra confirma a leve desaceleración detectada nos dous primeiros meses do terceiro trimestre. En termos intertrimestrais, o crecemento da actividade económica de Galicia tamén caeu unha décima, situándose no 0,7%.

Ao abeiro da tendencia amosada polo Indicador nos nove primeiros meses do ano (especialmente no terceiro trimestre) todo apunta que a Contabilidade Rexional que o Instituto Galego de Estatística (IGE) publicará esta semana reflectirá valores semellantes ou lixeiramente por baixo aos do trimestre pasado (un crecemento interanual dun 2,8% e intertrimestral dun 0,6%).

No que vai de ano, a variable recollida no Indicador que experimenta un maior crecemento é o consumo de gasolina e gasóleo. Pola súa banda, en termos interanuais (últimos doce meses) o mellor comportamento anótase nas vivendas a construír. No lado negativo, cómpre destacar a desfavorable evolución da produción de vehículos turismo.

Este Indicador está elaborado pola equipa de conxuntura económica do Foro Económico de Galicia a partir da análise de 15 variables económicas que inclúen cifras de emprego, facturación empresarial, comercio internacional, actividade industrial e do sector servizos.

Comentarios
O último Indicador Abanca-Foro de Conxuntura confirma a "leve" desaceleración da economía galega