ABANCA E DEPUTACIÓN DE PONTEVEDRA RENOVAN O ACORDO DE COLABORACIÓN

O Plan Activamos ten achegado máis de 180 millóns de euros en crédito ao tecido empresarial pontevedrés

A Deputación de Pontevedra e Abanca veñen de renovar o Plan Activamos cunha nova liña de crédito de 50 millóns de euros destinada a financiar, en condicións melloradas respecto ao mercado, a pemes, autónomos, familias e corporacións locais da provincia pontevedresa.

O Plan Activamos ten achegado máis de 180 millóns de euros en crédito ao tecido empresarial pontevedrés
Santiago Novoa e Carmela Silva (centro) renovaron o acordo entre Abanca e Deputación de Pontevedra para o Plan Activamos.
Santiago Novoa e Carmela Silva (centro) renovaron o acordo entre Abanca e Deputación de Pontevedra para o Plan Activamos.

Este programa financeiro inicia a súa cuarta edición consolidado como unha ferramenta clave na inxección de crédito ao tecido produtivo pontevedrés. Nos seus tres anos e medio de vixencia, este plan permitiu impulsar o desenvolvemento socioeconómico da provincia con 180,9 millóns de euros. En total, formalizáronse ata a data 7.895 operacións de crédito, na súa gran maioría para financiar investimentos ou atender necesidades de tesourería de emprendedores, pemes e autónomos da provincia de Pontevedra. No último ano, no marco deste programa pecháronse 1.810 préstamos na provincia, por un importe global de 43,7 millóns de euros.

Tras rubricar o convenio de renovación do plan, a presidenta da Deputación de Pontevedra, Carmela Silva, e o director de Banca Institucional de Abanca, Santiago Novoa, acompañados pola directora territorial do banco en Pontevedra, Carmen Fernández Penas, expuxeron as principais cifras alcanzadas e as distintas modalidades do programa financeiro, que nesta edición incorpora como novidades o incremento de 100.000 a 200.000 euros do importe financiable e o aumento dos prazos de amortización ata os 10 anos nos préstamos a pemes e autónomos.

Carmela Silva manifestou a súa satisfacción “porque Pontevedra é a provincia que lidera o número de operacións que supoñen o 40% de todas as que se levan a cabo en Galicia. A nosa provincia estase a impulsar, sinalou, volvemos estar en situacións de crecemento. Hai dinamismo, proxectos e ideas que precisan financiamento”.  

A presidenta provincial destacou especialmente os préstamos para a rehabilitación de vivendas no medio rural “porque temos un gran compromiso para manter a poboación e para iso a vivenda é un dos instrumentos fundamentais. Con estes recursos, dixo Carmela Silva, Abanca apoia que poida haber calidade de vida neste entorno para manter a poboación, para coidar o medio ambiente, evitar os lumes e que quen vivimos nas urbes teñamos a seguridade de que se mantén o noso patrimonio ambiental”.

Pola súa banda, o director de Banca Institucional de Abanca, Santiago Novoa, afirmou que “esta alianza estratéxica coa Deputación de Pontevedra vai permitir seguir contribuíndo ao progreso socioeconómico da provincia a través da achega de crédito en condicións vantaxosas”. “Non é un plan dun só ano, senón unha oferta de crédito tanxible, de continuidade e sostida no tempo para atender necesidades de financiamento e facer realidades proxectos das empresas e familias”, sentenciou.

Na mesma liña, Carmen Fernández explicou que “en todos os casos, trátase de crédito flexible e en condicións especiais, a baixo tipo de xuro, sen comisións de estudo, amortización nin cancelación e tamén con carencias nalgunhas modalidades”. “É un programa que contribúe de maneira decidida á mellora competitiva da provincia, pois máis do 98% do crédito destinouse a pemes e autónomos”, subliñou a directora territorial da entidade en Pontevedra.

Apoio ao tecido empresarial

As pemes, micropemes e autónomos son os principais beneficiarios do Plan Activamos. O programa oferta para este segmento crédito para a posta en marcha de proxectos emprendedores, desenvolvemento de novos investimentos empresariais, creación de emprego, actuacións de mellora enerxética nos negocios e cobre tamén necesidades de circulante.

Para as familias, esta iniciativa de financiamento oferta préstamos para a dotación de equipamento tecnolóxico, realización de actividades de formación, reformas no fogar que contribúan á mellora da accesibilidade ou a eficiencia enerxética, adquisición de vehículos eficientes e rehabilitación de vivendas unifamiliares en poboacións do rural.

Finalmente, as corporacións locais poden optar no marco deste programa a préstamos para acometer pequenos investimentos municipais e atender necesidades de tesourería, sen esquecer que teñen á súa disposición avales e liñas de confirming con tarifas especiais.

Comentarios
O Plan Activamos ten achegado máis de 180 millóns de euros en crédito ao tecido empresarial pontevedrés