Nomeadamente, cómpre salientar que, neste primeiro trimestre de ano, dos oito indicadores do BAEXGA,  Galicia iguala en catro a excelencia ex­portadora do conxunto de España. Son a taxa de crecemento interanual das exportacións, a taxa de crecemento internanual das exportacións cara á Unión Europea, a taxa de crecemento interanual das empresas exportadoras e a taxa de crecemento interanual das empresas que exportan á UE. Noutros dous indicadores, Galicia recorta a fenda acumulada nos últimos dez anos, ao tempo que só cara as economías emerxentes o desempeño galego foi insuficiente.

Confección e automoción, comportamentos diferentes

Atendendo ao comportamento sectorial, as actividades da confección superan a notable cualificación exporta­dora total. Máis aínda, sitúanse por riba do dinamismo español da última dé­cada, observando só unha lixeira caída das empresas exportadoras cara á UE e un menor crecemento das exportadoras cara as economías emerxentes

O sector da automoción arranca o ano cun negativo comportamento exportador (sobre todo dentro da UE) e sen recuperar os niveis previos á crise (cousa que si é un feito no conxunto de España). No número de em­presas exportadoras anótase, pola contra, un comportamento positivo.

O BAEXGA, elaborado por expertos do Foro Económico de Galicia, avalía o pulso competi­tivo da economía galega tendo en conta non só as cifras de vendas ao exterior senón tamén o número de empresas que as realizan. Nos dous casos consi­dérase a evolución interanual total, pero tamén o detalle do que sucede nos mercados europeos e cara as grandes economías emerxentes. O BAEXGA incorpora ao mesmo tempo a evolución no longo prazo (nos últimos dez anos) tanto das exportacións como das empresas exportadoras.