Que a eficiencia empresarial e a responsabilidade social poden convivir de forma natural é algo que demostran en Galicia máis de 4.700 empresas, entre cooperativas, centros especiais de emprego, sociedades laborais e centros de inserción. Da súa capacidade de resistencia di moito o feito de que en 2020, a pesar da crise provocada pola pandemia, creáronse 126 novas firmas de economía social. É por este éxito logrado que o Foro pola Economía Social Galega segue traballando con máis ímpeto que nunca tres anos despois da súa constitución e así llo transmitiu o seu presidente, Celso Gándara, á conselleira de Emprego e Igualdade, María Jesús Lorenzana.

No encontro abordouse a presenza da economía social nos fondos Next Generation e informouse á responsable de Emprego das xestións realizadas para a obtención dun PERTE (Proxectos Estratéxicos para a Recuperación e Transformación Económica) de Economía Social a nivel estatal. Así mesmo, Gándara solicitou unha reformulación da Rede Eusumo “para actualizar as novas necesidades de desenvolvemento” e apostou por un programa específico de transformación de empresas en situacións de crises en entidades de economía social, “dada a súa contrastada capacidade de resistencia”.

A conselleira de Emprego e Igualdade, María Jesús Lorenzana, pola súa banda, coincidiu no papel relevante da economía social para a recuperación tras a pandemia por defender “fins de interese xeral e colectivo” o que, ao seu criterio “permiten xerar máis emprego e de máis calidade, garantir unha mellor redistribución dos recursos e favorecer a cohesión territorial e social”.

Coa firma do convenio, Lorenzana destacou que a  Xunta referenda o seu compromiso coa economía social por dúas razóns esgrimidas pola conselleira: ser “un modelo de crecemento máis sostible, máis inclusivo e máis igualitario” e, por outra banda, por se converter nunha “fonte de oportunidades laborais que requiren dunha actuación conxunta e solidaria”.

Segundo reafirmou a titular de Emprego e Igualdade, a economía social supón “unha fórmula de éxito que repercute no beneficio colectivo” o tipo de fórmulas que, segundo engadiu, “necesitamos para recuperarnos do impacto tan negativo que nos deixa esta pandemia”.

O encontro na Xunta de Galicia responde ao labor de representación encomendada ao Foro polos seus asociados, tarefa que persegue a participación da economía social naqueles momentos e lugares nos que se debate o futuro de Galicia. Non en balde, estas empresas representan o 7% do PIB autonómico, polo que son xa peza crave dentro do quebracabezas da economía galega.

O Foro pola Economía Social Galega súmase ás liñas mestras marcadas polo Goberno galego, que ante as autoridades comunitarias defende que a economía social ten demostrado que os valores que impregnan este tipo de organizacións xeran un comportamento diferente ao resto de organizacións mercantís, profundando en cohesión social e territorial. De aí a elección de Galicia como Rexión Aamiga da Economía Social unha vez máis neste 2021.