Un total de 33 concellos galegos son os seleccionados nesta convocatoria de axudas para realizar diversas actuacións nos seus parques empresariais e nos que a Xunta inviste un total de 2,5 millóns de euros. Todos eles pertencen á rede de concellos emprendedores.

Estas axudas, de ata un máximo de 120.000 euros por proxecto, están destinadas á implantación de iluminación pública eficiente, plantas de depuración de auga, xestión de residuos, instalación de sistemas de seguridade, contraincendios e contra o roubo de cable, servizos centralizados de subministración de gas e hidróxeno verde, así como á mellora de infraestruturas viarias. Os beneficiarios poderán acceder a anticipos do 25%.

Por provincias, A Coruña acada 11 axudas, Lugo 5, Ourense 7 e Pontevedra 10. A ampliación do orzamento inicial permite que as axudas cheguen a catro novos concellos: Cabana de Bergantiños recibe 120.000 euros para a mellora de accesos; Palas de Rei contará con 28.328,98 euros para a mellora do firme; Agolada obtén 119.983,60 euros para as infraestruturas viarias; e O Pereiro de Aguiar mellorará a vía de acceso noroeste cunha axuda de 38.587,14 euros. Ademais, o polígono de Augalevada, en Noia, consegue  unha segunda axuda (44.213,43 euros) destinada ao punto limpo. Pola súa banda, o concello das Somozas amplía a contía da súa axuda ata os 120.000 euros para a pavimentación da vía principal do seu parque empresarial.

Esta liña de axudas, promovida pola Xunta, contribúe a apoiar aos concellos galegos e impulsar a captación de investimentos en Galicia. Neste sentido, encaixa nas medidas que fomenta a Lei de implantación empresarial na que os concellos emprendedores teñen un papel fundamental á hora de colaborar co Goberno galego para achegar ás empresas beneficios fiscais, acceso ao solo e facilidades administrativas a cambio de contar con prioridade en axudas deste tipo.