VI Mesa do Emprego Autónomo

A Xunta convocará axudas para o relevo xeracional e para dar unha segunda oportunidade aos autónomos

O conselleiro de Economía, Emprego e Industria, Francisco Conde, avanzou este mércores, tras a súa participación na VI Mesa do Emprego Autónomo, dúas novas medidas que a Xunta porá en marcha nas próximas semanas a través da súa convocatoria no Diario Oficial de Galicia para apoiar a este colectivo.

A Xunta convocará axudas para o relevo xeracional e para dar unha segunda oportunidade aos autónomos
Xuntanza da Mesa do Emprego Autónomo en San Caetano.
Xuntanza da Mesa do Emprego Autónomo en San Caetano.

No transcurso da VI Mesa do Emprego Autónomo, o conselleiro de Economía, Emprego e Industria tamén informou das campañas de formación en prevención de riscos laborais que desenvolve o Instituto de Seguridade e Saúde Laboral de Galicia (ISSGA).

Conde indicou que a nova orde de axudas ao relevo xeracional promoverá a transmisión nos negocios dos traballadores por conta propia que estean próximos á idade de xubilación, lembrando que na actualidade en Galicia máis do 30% dos autónomos galegos se sitúa por riba dos 55 anos. Este programa, consensuado co sector, ofrecerá asesoramento no traspaso da actividade económica se a persoa traballadora conta con 63 anos ou máis, ten unha declaración de incapacidade total ou se trata dun herdeiro no caso de falecemento do titular da empresa. “Facilitaremos a intermediación para identificar as condicións óptimas do traspaso e para facilitar os plans de formación do novo autónomo”, explicou Conde.

Con respecto ao programa de axudas para a segunda oportunidade, o titular de Economía apuntou que o obxectivo é que toda persoa autónoma que queira reemprender un negocio poida facelo adquirindo un compromiso de formación. Así, esta liña de axudas centrarase na formación para que os beneficiarios poidan afrontar a nova actividade con todas as garantías  e incluirá un bono específico para investimentos que lles permita afrontar as novas necesidades. Os apoios, tal e como subliñou o conselleiro, serán compatibles con outros programas que a Xunta ten a disposición deste sector.

As dúas liñas forman aprte da Estratexia Autónomo 2020 do Goberno galego, que dedica unha media de 40 millóns anuais a apoiar aos traballadores por conta propia.

Campañaas de sensibilización

Da Mesa do Autónomo, foro no que participan as principais asociacións do sector, tamén forma parte o Instituto de Seguridade e Saúde Laboral de Galicia (ISSGA). Neste senso, o conselleiro informou das diversas campañas de información e sensibilización que se están desenvolvendo para promover un emprego saudable e seguro destacando que “a aposta pola seguridade e a saúde laboral é unha prioridade nas nosas políticas de emprego”.

A Xunta convocará axudas para o relevo xeracional e para dar unha segunda oportunidade aos autónomos