O programa abranguerá varias sesións dirixidas a colectivos empresariais específicos, nas que diversas empresas exporán a súa experiencia particular no uso dun produto ou servizo TIC de utilidade para o colectivo.

O programa #UpdatePeme abordará, en sesións afterwork, tecnoloxías que poidan ser útiles de forma inmediata, desde un punto de vista moi práctico e con casos reais de aplicación en empresas. Ademais, os relatores deixarán fíos, cuestións de interese, para que os participantes poidan tirar e, desta forma, espertar o interese das empresas asistentes e que sexan estas as que decidan afondar ou pedir máis información do produto ou servizo exposto.

Turismo, primeiro sector en #UpdatePeme

O programa comezará o vindeiro 23 de febreiro coa sesión “ #Updatepeme_Turismo: Como a dixitalización pode axudar ás empresas turísticas”. Nesta primeira sesión, na que colabora o Clúster Turismo de Galicia, o experto en turismo e TIC, Enrique Lancis, introducirá a visión xeral da tecnoloxía existente no mercado para a comercialización turística.

A continuación abordarase a tecnoloxía aplicada por diversas empresas do sector. A modo de faladoiro aberto, compartirán a súa experiencia práctica no uso de ferramentas TIC como consolidadores, seguimento de prezos, social media, comercio electrónico, CMS e como a aplicación das mesmas cambiaron o seu día a día.

Para participar nesta actividade, de balde, cómpre inscribirse na web do CDTIC.