Buscar
16:42h. Martes, 25 de Septiembre de 2018

A CIG sae a rúa este xoves e CCOO e UGT o sábado

Os sindicatos intensifican a campaña en defensa das pensións

Os tres principais sindicatos intensifican este días as súas campañas en defensa do sistema público de pensións.

Unha protesta convocada pola CIG sobre as pensións, en Santiago./CIG.
Unha protesta convocada pola CIG sobre as pensións, en Santiago./CIG.

Así, o  colectivo de Xubilados/as e Pensionistas da CIG convoca até 11 este xoves 15 de marzo, mentres que o S.N. de CCOO de Galicia e UGT-Galicia convocan 13 protestas o sábado 17.

A central sindical nacionalista, que promove estas protestas no marco da campaña para reclamar emprego, salarios e pensións dignas, decidiu convocar manifestacións e concentracións nas sete cidades galegas e nas localidades de Lalín, As Pontes, Boiro e Cee en horarios que van dende as 11 até as 19:30 horas. No centro das reivindicacións, “evitar o ‘roubo’ das pensións públicas, garantir o nivel adquisitivo das prestacións e lograr a derrogación das últimas reformas aprobadas por PSOE e PP”, explican nun comunicado.

Pola súa banda, CCOO e UGT organizan mobilizacións o sábado 17 de marzo, na Coruña, Ferrol, Santiago, Lugo, Ourense, Pontevedra, Vigo, Vilagarcía, Viveiro, Foz, Ribeira, O Grove e O Barco de Valdeorras. Nestas convocatoria Demandarán prestacións dignas, a recuperación do poder adquisitivo das pensións e denunciarán “a miserable e irrisoria” suba do 0,25%.

Entre as principais demandas da CIG salientan o adianta da idade de xubilación, como mínimo aos 65 anos; a equiparación da pensión mínima ao salario mínimo; que a actualización anual das pensións sexa equivalente, como mínimo, ao IPC; rematar coas bonificacións e descontos para o empresariado nas cotizacións; a supresión do límite máximo de cotización para os salarios máis altos; acabar co uso indebido dos fondos da caixa da Seguranza Social, dedicándoa a financiar as pensións contributivas, de viuvez e orfandade, e asumindo as demais pensións asistenciais e subsidios aos Orzamentos Xerais do Estado.

Demandas compartidas, en liñas xerais, polos dous sindicatos estatais. CCOO e UGT consideran que o Goberno "debe garantir xa o poder adquisitivo das pensións; erradicar o déficit da Seguridade Social e garantir o presente e futuro das pensións e do sistema público". “Porque hai que eliminar as subvencións con cargo á Seguridade Social, cuxo custe debe asumir o Estado; porque hai que conseguir que os gastos do sistema se paguen como o resto dos organismos públicos, cos Orzamentos Xerais do Estado e non con cotizacións; porque hai que destopar as cotizacións; e porque hai que mellorar os ingresos do sistema, tanto os derivados de cotizacións como de ingresos fiscais”, enumeran os motivos para acudir a estas protestas, que se enmarcan nunha campaña de ámbito estatal que comezaba en setembro pasado e que “será sostida e crecente” mentres o Goberno central non mude a súa postura.

As segundas pensións máis baixas do Estado

Desde a CIG sinalan que a pensión media en Galicia é 15 puntos máis baixa que a media estatal, as segundas prestacións máis baixas despois de Extremadura. UGT e CCOO denuncian que a pensión media sitúase en 918 euros e a máis frecuente en 650 euros e que o 50% das pensións non chega ao SMI e o 38% dos pensionistas viven baixo o limiar da pobreza. Tamén recordan que as pensións son a fonte de ingreso de máis de nove millóns de persoas.