Buscar
12:16h. Lunes, 19 de Noviembre de 2018

Networking sobre innovación, renovación e consolidación comercial en Ourense

471 comercios beneficiaranse dos apoios da Xunta para a súa dixitalización e modernización

A Xunta de Galicia destina 1,5 millóns de euros a axudas para a dixitalización e modernización de empresas comerciais e artesanais, das que se beneficiarán un total de 471 comercios e obradoiros artesanais.

Sol Vázquez (centro) xunto a membros da Federación Galega de Comercio e da Federación de Comercio de Ourense.
Sol Vázquez (centro) xunto a membros da Federación Galega de Comercio e da Federación de Comercio de Ourense.

Así o expuxo a directora xeral de Comercio e Consumo, Sol Vázquez Abeal, durante a celebración en Ourense, nun networking sobre innovación, renovación e consolidación comercial, celebrado en colaboración coa Federación Galega de Comercio. Na xornada, na que se abordou de xeito específico o impacto do novo regulamento europeo de protección de datos no sector, Vázquez Abeal sinalou que a dixitalización é un reto que pode potenciar as fortalezas do pequeno comercio, como son a proximidade, o trato personalizado e a calidade.

Neste sentido, Vázquez salientou os apoios publicos postos en marcha polo seu departamento para a implantación de solucións que permitan aos comercios e obradoiros artesanais adaptarse ás novas fórmulas de comercialización e ás tendencias do mercado, así como proxectos de modernización integral de locais.O investimento subvencionable, segundo o tipo de apoio solicitado, pode ir dos 1.000 aos 5.000 euros no caso de dixitalización e entre os 15.000 e os 30.000 no caso de actuacións de modernización. A porcentaxe de axuda é en todos os casos do 50%.

Comerciantes e artesáns desenvolverán 313 actuacións de implantación ou actualización de páxinas web comerciais e de mellora da imaxe en liña. Así mesmo, poñeranse en marcha 63 iniciativas centradas na loxística dixital ou a implantación de packaging para venda en liña. Doutra banda, activaranse 144 proxectos de ferramentas de xestión, e modernizaranse 112 locais.

Ademais, a través desta mesma orde de axudas, máis de 100 comercios contan co asesoramento dun xestor de redes sociais para desenvolver novas fórmulas de promoción e comercialización en internet, no marco do programa de Social Commerce que se desenvolve en colaboración coa Federación Galega de Comercio. O obxectivo desta iniciativa é potenciar a presenza do comercio galego de proximidade nas redes sociais, impulsando a súa conexión co cliente e creando novas redes de fidelización e imaxe de marca, buscando adaptar o comercio de proximidade ás novas tendencias do mercado.

Estas axudas enmárcanse no Plan Estratéxico de Impulso ao Comercio de Galicia, que ten entre os seus retos o establecemento dun novo modelo de comercio intelixente que sitúe ao cliente no centro da súa estratexia aproveitando todos os recursos á súa disposición.